梁政珏前年結婚，同年誕下得意B仔Johnson，由昔日咪神到做全職靚媽，她坦言相當享受目前生活模式。
日前梁政珏帶囝囝接受訪問，囝囝哭鬧時，她總有法寶𠱁掂，又謂：「我其實好內疚，因餵母乳只有4個月，佢停食後有嚴重濕疹，我好怪責自己，但身體真係支持唔到。」
因胎盤問題，梁政珏產前已開始要卧床，產後左邊盆骨則嚴重痛楚，她自爆：「我試過半夜跌咗喺洗手間，全部人瞓晒，我知我真係無力再繼續，就連父母、老爺奶奶同老公都唔畀我再繼續餵。」可有計劃再生？她直言老公好想生多一個，但暫時她未準備好，最怕再要入院，沒人照顧囝囝。對於囝囝的期望，梁政珏自言希望他學懂愛錫及保護自己，便是孝順父母了。
採訪：小米
服裝提供：Take a nap HK
場地提供：銅鑼灣迷你酒店