之前提過郭能舊年主席賽馬日起孖，已是當日頭馬最多騎師，卒之這天（13日）新一屆主席賽馬日，佢跑到第六場四班1400米終於破蛋，憑大摩馬房「猛闖」捧走黃頌顯盃，該駒第十次在港出賽首度入三甲即贏馬開齋，單Win及組合獨贏A1分別派73及37.5元。
「闖」系馬主張顯信這天開場前，已有一段時間冇贏過名下馬，最終佢發市當三年，第二場張奧偉盃先由潘頓勝出賀賢訓練的「揮闖」，第六場再有郭能幫佢贏「猛闖」，此駒沿途守五六位，直路克服133磅障礙，以短馬頭位之先衝贏對手，張顯信個人全日雙龍出海，錄得百分百取勝兼連捧兩盃，可謂一掃近年養馬頹風。而「揮闖」、「猛闖」巧合地都係負133磅的降班馬。
上屆黃頌顯盃以「執子之手」跑第二的呂健威及蔣嘉琦，今年不幸再做阿二，蓋兩人合作馬「鑽飾傳奇」飛出大外疊蝕位追，結果姍姍來遲影相僅敗，屈居亞軍，嘉琦4月5日贏「五星特工」後守齋逾一個月，仍未破悶局。
今場第三名為冷門「海嵐一號」，而「帝聖之寶」大熱跑梗頸四，四重彩派七萬八千幾。三T正獎冇人中，安慰獎派近五千九百元。