不知是否一套紀錄片「消失的檔案」引起，最近有唔少人談論1967暴動，有報紙以大篇幅報導，當年上街示威人士（當年稱之為暴徒）要求「平反」，即係話要重新評價六七年暴動，工聯會更加組團到和合石公祭「義士」。
左丁山未睇過「消失的檔案」，但據知情人士告知，本港戲院以「商業理由」（怕唔賣座，唔收得喎）封殺套戲，令「消失的檔案」不能上畫，只能以私人方式招待有興趣人士，譬如在中大逸夫堂放映，又曾私人放映招待網購讀者等。
今日戲院老細，莫不識時務，見過「十年」被親中建制派批鬥，仲唔怕黑咩，所以對「消失的檔案」一早耍手擰頭。一位朋友嘅朋友去私人場合睇過呢套紀錄片，睇到幾乎失聲痛哭，問佢點解咁激動，佢話當年父親係工聯會熱心擁躉，暴動期間攞咗一大批反英抗暴宣傳單張返屋企，要兒女整理好，再出街派發，呢位朋友嘅朋友當時十歲未到，阿爸講乜就做乜，如今自己都開始老咯，睇電影回憶兒時情景，不禁感觸下淚。
下淚也者，包含當時「點解咁笨」之情意結。「消失的檔案」訪問咗不少1967年上街工人，據說係由親中人士安排嘅，點知見到套戲嘅最終版本，竟然不是「平反宣傳片」，而是寫實反思片，就非常唔高興。近日老左派在愛國報紙大力美化1967反英抗殖，幾可能係要為「消失的檔案」所傳遞嘅信息消毒。
左丁山當年讀右派中學，考入右派新亞書院，兩校逢十月十日皆掛青天白日旗，放假一天；適逢屋企包租公係左派的士司機，與先父呢位籌錢坐船去台北參加國慶閱兵嘅大右派意見如南極對北極，好在兩人見面就克制不發一言，冇鬧交啫，「國共兩派」在屋細人多嘅唐樓內仍然保持表面和平，當年左丁山屋企冇麗的電視，自己閉關傾全力應付中大入學試，1967年上半年對時事少聞少問，現在回憶起來，竟然所知不多，反而太太方面，當時住在港島東區，對北角之左派橫行情景，如歷歷在目，對街上土製菠蘿之恐懼，至今猶有餘悸。1967暴動，只係香港土共在工聯會領導下之反港英激烈行為，與絕大部份香港人無關，而工聯會當時又受北京文革派毛派影響，係內地文革在香港的延伸，應定性為左傾盲動主義，燒死林彬一事，全港憤慨，激進左派之罪，水洗唔清，50年後，竟然有人講到要為67暴動平反，嗰啲人倒不如為自己當年被北京毛派及香港黨棍利用，做咗大笨豬而懺悔啦！