雷神停賽，潘頓今午（13日）於沙田馬場全力去馬，直落贏晒頭三場後，第四場騎「曾幾何時」跑第二；到第五場四班田草1000米直路賽，潘頓繼續搏殺，可惜胯下「極速前進」搏盡又係二奶，輸咗俾李寶利同蔡約翰合作的服役初出馬「天下為攻」；惟潘頓頭五場累積三冠兩亞，贏硬今期騎師王。
三歲馬「天下為攻」其中一位馬主是馬會董事利子厚，今仗初出即捧走施偉賢盃，沿途守第八位，直路後上如飛險勝頭位，帶挈埋落飛黨中正5.5倍綠燈Win，組合獨贏A1則派14.5元。蔡約翰連同頭場新馬賽由潘頓贏「旺蝦王」，這天跑完上半場他憑一對服役初出馬起孖，季內增至78Win，破了05至06馬季他有77Win之個人在港單季最佳成績，但仍不及04至05馬季告東尼91Win之香港紀錄。
季初曾因墮馬養傷一段日子的李寶利季尾追落後，「天下為攻」帶俾佢季內第六Win，呢位意大利騎師今季開齋馬「開心遊戲」亦來自蔡約翰，咁啱都係贏田草。
第五場二至四名分別為「極速前進」、「自由旺」及「龍城猛將」，四重彩派7,904元。着綠燈的亞軍馬「極速前進」由容天鵬訓練，連贏搭頭馬「天下為攻」同樣着綠燈，跑完只得15倍，又一條蔡、容師徒Q開出。反觀配史卓豐1.9倍大熱門「鞍歌」由頭到尾表現乏善足陳只得第五，輸到捧場客暈暈哋。