公民黨噚晚舉行咗11周年籌款晚宴加酒會，絕對稱得上係星光熠熠，無論左中右各路人馬都有現身，民主黨主席胡志偉、社民連梁國雄、香港眾志羅冠聰等不在話下啦，3位參選過特首嘅人，候任特首林鄭月娥、薯片叔曾俊華同新民黨葉劉淑儀都有現身，林鄭仲坐到食第二味餸先走，夠晒畀面。
講到明籌款晚宴，公民黨上下都梗係要落力表演啦！公民黨主席傑哥梁家傑可算係傾力演出，頭炮先嚟個舞獅表演，功架十足，然後驚喜之作就係換上一身金色裝束，跳咗PPAP嘅舞步，全場都拍爛手掌。
奶媽睇到拍晒手掌
不過講到跳舞，公民黨副主席陳淑莊直頭提升至另一個層次。Tanya着上性感大放送嘅露背晚裝，演出佢苦練咗約10個鐘頭探戈。連林鄭都睇到拍晒手掌，查實Tanya為咗練呢隻舞，直頭賣力到整裂咗胸骨，所以噚日嘅表演名副其實係帶傷上陣。
但論最多尖叫聲呢，非公民黨男神黨魁AY楊岳橋，連同4名黨友譚文豪、鄭達鴻、余德寶同錢偉健嘅「削肉救黨」，佢哋5人由月初開始減肥，減到噚日合共減到20磅目標籌20萬，結果超額減足43磅，佢哋仲即刻變陣除衫示範「賣肉救黨」，其實佢哋係着咗啲「假肌肉」衫箒！不過AY一脫，個市即刻大升，唔少人搶住捐畀佢。
噚晚拍賣余若薇字畫、手工啤等共籌近廿萬，Tanya跳舞獲林大輝、岑建勳各捐5萬，加埋傑哥live band伴奏嘅演唱，公民黨籌款收穫都唔錯，全晚籌得430萬。
李八方
