填補DQ青年新政游蕙禎嘅立會九龍西議席補選，可能出年1月先舉行，但好多黨派早已磨拳擦掌，民協亦一早話內部搞初選。舊年9月曾選超區嘅何啟明亦話會參加，點知佢噚日突然喺fb發文，話決定唔參加民協九西補選黨內初選，以黨內團結為先，而同民協中委會嘅初選安排未能達成共識，希望大家諒解，民協前立會議員馮檢基暫為唯一報名候選人。
不過佢喺po臨尾加咗兩句，感激大家對佢同民協支持，日後江湖再見，似乎暗示會退埋黨。八方問過佢，佢澄清冇打算退黨，只係覺得民協突推「落三閘」初選機制有問題，認為自己好難贏，又話若然最終民協決定派基哥參加補選，佢會全力撐基哥。民協主席施德來話雖然得番基哥一人初選，但初選論壇照舊，但投票就變投信任票，亦維持三分二支持才通過嘅門檻。