馬刺冇尼納特一樣掂！西岸二哥馬刺就算冇咗主力前鋒尼納特（Kawhi Leonard），周四作客依然以114:75狂勝火箭，以場數4:2晉級決賽，將同一哥勇士交手，呢個夢幻西岸決賽首戰將喺周日展開。
普波域治贏足迪帥20次
馬刺上仗主場激戰至加時先險勝火箭，今仗仲有尼納特因足踝傷缺陣，不過意外地完勝主隊；前鋒阿域治（LaMarcus Aldridge）打出爭氣波，貢獻34分同12籃板。相反火箭後衞夏登（James Harden）就全場遊魂，上半場射入兩球，不過就有五個失誤，埋單全場只得10分但有六次失誤。第四節垃圾時間，夏登更加冇品到特登拎第六次個犯離場，費事丟架，不過賽後就俾網民瘋狂改圖恥笑（右圖）。馬刺完勝火箭，亦係馬刺教練普波域治（Gregg Popovich），歷來第20場季後賽擊敗火箭教練迪安東尼（Mike D'Antoni），亦都平咗前公牛、湖人教練積遜（Phil Jackson）擊敗爵士教練史龍（Jerry Sloan）嘅紀錄。
不過咁，馬刺休息兩日就要同勇士打西岸決賽首戰，兩軍自2013年再度季後賽交手，雖然尼納特有望復出，不過就肯定冇咗後衞柏加（Tony Parker），而且勇士連續橫掃拓荒者同爵士，大把休息時間，早前K湯遜（Klay Thompson）等球員更加得閒到去釣魚㖭，難怪湖人名宿拜恩（Kobe Bryant）都睇好勇士入總決賽多啲。
