立法會噚日同鄉議局議員舉行閉門會議，再同佢哋喺宴會廳舉行午餐會，除咗唔少建制派議員畀面出席，非建制派方面，一向關注城鄉發展嘅朱凱廸、姚松炎都首度現身，朱凱廸更喺開飯前，向一班鄉議局議員派發佢橫洲發展「三贏」方案嘅傳單。曾炮轟朱凱廸「官商鄉黑」論係抹黑鄉議局嘅錦田鄉事委員會主席鄧賀年，同元朗猛人、厦村鄉鄉事委員會主席鄧勵東，食飯期間「夾擊」朱凱廸，同朱凱廸雞啄唔斷，並邀請朱凱廸得閒要到佢哋「地頭」見面。
朱凱廸話今次係首次同一眾鄉議局領導坐埋食飯，話同鄧賀年同鄧勵東傾得「幾開心」，會上冇乜人鬧佢，佢就鄉議局解釋，自己只係為鄉議局着想，希望鄉議局變得更有公信力同受巿民信任。
交換電話慢慢傾
朱凱廸會上亦講解咗唔少對城鄉發展嘅睇法，但相信一眾鄉紳要慢慢花時間至明佢講乜，所以午餐會上互相交換咗電話。首次同一眾鄉議局領導食飯嘅朱凱廸笑言，午餐時唔少鄉委會主席粗口橫飛，「好多鄉議局議員都媽媽聲」，話政府嘅棕地政策好搵笨喎。