「吓？(高八度)真係要問？我驚閃爆全香港人！」
跳高女神Cecilia楊文蔚，唔止腹肌線條靚，仲笑到有腹肌。
經常大笑。每個問題都係自己答完自己笑。傻得好可愛。
「er…我唔係好覺得自己係女神(掩嘴瞇眼笑)，我覺得女神係……應該好少㗎嘛！應該好靚呀，好有仙氣，好『仙』嗰啲，接觸唔到嘅，先係女神呀嘛！」
「失戀聽咩歌？(認真思考)好似…嗰陣聽過Twins嘅《丟架》…係，好耐之前喇，我係Twins嘅忠實fans嚟嘅（舉起手有啲怕醜）。」
「有剪過（頭髮），之前，咁短啦（手放肩上比劃長度），啲人話好樣衰，之後就留番長。」
「其實我都完全出乎意料(咧嘴可愛笑)，都唔知點解自己可以世界排名第9，希望呀？希望可以keep住都幾好㗎喇。可能……(認真思考)……前五啦！好盡喇，前五啦！」
「跳高有咩用？」
「好多人都係因為跳高認識我，咁我希望因為我而大家認識多啲跳高啦！」
本地體壇越嚟越多女神出現，香港首名女子全職跳高運動員Cecilia係其中一位。擁有一頭長髮、甜美笑容，以及目測41吋長腿嘅Cecilia，有實力仲有樣。上個月佢喺台北舉行嘅亞洲田徑大獎賽嘅女子跳高項目，以1米88打破自己保持嘅香港女子跳高紀錄奪得冠軍，今年世界排名更一度升上第九，隨即成為台灣傳媒寵兒，風頭一時無兩。星期日，佢再出擊灣仔運動場。
唔少傳媒都報道過Cecilia嘅成長背景以及跳高威水史，但大家又了解佢幾多呢？今次我哋就同呢位跳高美少女嚟個「快問快答」，畀大家可以了解女神最真嘅一面，佢仲自爆唔少秘密！例如佢個英文名「Cecilia」嘅由來、下一個紋身會紋咩以及同拍拖多年嘅男朋友相處趣事都會毫無保留同大家分享。
想知「女神的秘密」？即刻去片啦！
採訪：植詠珊（Cathy)
攝影：Neo﹑峰
剪接：Roy
