新民黨主席葉劉淑儀噚日慶祝新民黨6歲生日，除咗已退黨嘅田二少田北辰「回巢」捧揚，唔少政壇猛人亦有現身，包括薯片叔叔曾俊華。薯片叔叔被葉劉問到，係咪已報名做亞投行行長時，即答絕對唔會，又話做副行長消息亦只屬傳聞。咁薯片叔叔最近忙乜？佢笑笑口話：「忙緊hea。」教育局局長吳克儉噚晚亦有現身，佢話自己7月1日後就會「真退休」，一向出名鍾意旅行多過做嘢嘅吳得掂，強調咗兩次自己將會「食吓嘢同埋旅遊」，亦會同家人睇吓書，希望大家尊重佢嘅決定。
而政制及內地事務局局長譚志源就話，佢7月起會去個長短trip加郵輪旅行，會去北美洲、冰川同打高爾夫球，「一兩個月都唔喺香港」。譚志源又承認已經有人搵佢做政府以外嘅工作，但現時只屬吹水階段，仲未定實會做乜喎。