捧盃兼進軍來屆歐聯？紅魔只差一步！周四歐霸盃4強次回合，曼聯挾首回合1:0優勢回師奧脫福出擊，雖然憑費蘭尼頭槌開紀錄，但臨完場前俾切爾達扳平，仲有艾歷拜利同對手後衛朗卡尼亞因為講手雙雙被逐，飽吃最後10分鐘驚風散總算保住1:1和局完場，總比數以2:1淘汰對手，香港時間5月25日凌晨將會同4強淘汰里昂嘅阿積士喺瑞典斯德哥爾摩爭冠！相比上場英超作客輸畀阿仙奴，曼聯可謂面目全非，只有米希達利恩、安達靴里拉同達美安連續兩場擔正，拉舒福特、連格、保羅普巴等中前場主力復出披甲；至於聯賽早早hea踢、各項賽事5連敗嘅切爾達同樣大幅輪換，前線靠伊亞高艾斯巴斯、約翰古達迪同薛斯圖三叉戟爭取入波。切爾達開賽初段係威係勢，4分鐘艾斯巴斯右路起左腳勁射，曼聯門將羅美路單手托出底線。紅魔開波10分鐘全面受壓，控球低至31%，直至普巴喺中場搶截成功，「的」咗4腳波後擺脫守將後策動反擊，拉舒福特稍為控甩腳先有首次威脅，但佢哋踢到17分鐘一擊即中，經過一輪傳送，皮球落喺拉舒福特腳下，佢右腳傳中落點精準，「爆炸頭」費蘭尼遠柱走甩對手頭槌頂入，為曼聯領先1:0！切爾達失波後猶如洩氣皮球，直至27分鐘先有柏保路靴南迪斯遠射攻門，同樣俾羅美路單手托出，翼鋒薛斯圖算係表現最活躍，完半場前左路底線傳中，但丹尼爾華斯頭槌斜出，切爾達半場落後0:1。兩軍換邊後各有入球機會，羅美路先擋出曉高馬路傳中，米希達利恩勁射亦俾切爾達門將沙治奧干地化解，其後切爾達前鋒約翰古達迪腳踢頭頂都錯失良機。曼聯本來打算換入卡域克穩住勝局，點知去到85分鐘俾切爾達守將朗卡尼亞後上助攻頭槌得手追平1:1，只差一球就能夠憑作客入球反勝晉級。戰情突然充滿火藥味，一次犯規喺中圈附近引發混戰，艾歷拜利同朗卡尼亞互相推撞下雙雙領紅被逐，路爾斯華倫西亞推跌古達迪反而走得甩，曼聯尾段有安達靴里拉將個波擺入網，但球證吹罰在先被判詐糊，加上古達迪面對空門錯失最後一擊，最終次回合各一言和，曼聯兩回合計贏2:1晉級決賽！由於紅魔喺聯賽爭逐前4形勢欠佳，餘下3場聯賽對熱刺、修咸頓同水晶宮，領隊摩連奴有可能作出大幅留力，全力進軍歐霸決賽。