曼聯喺周四歐霸盃4強次回合飽吃驚風散，主場同切爾達踢成1:1，兩回合計僅勝2:1晉級決賽，最緊要係晉身來屆歐聯只差一步，難怪一向擺出cool樣嘅領隊摩連奴賽後都揈晒頸巾咁興奮！不過，切爾達喺呢180分鐘，佔9成時間都畀唔到太大威脅，但曼聯喺次回合下半場恃住兩球優勢嘆慢板，最終要call平安鐘可謂咎由自取，唔少魔迷都變身鍵盤戰士，喺網上大鬧摩佬戰術使唔使咁保守，要不是對手前鋒約翰古達迪錯失最後一擊，差啲自爆出局。摩佬級已晉一於理得你點批評，賽後話球員把握唔到入球機會，但戰鬥到底總算保住勝局，入到決賽好滿意咁話。對於之前帶領皇家馬德里對住阿積士6戰全勝，摩佬就話而家帶曼聯根本冇得比較，仲好羨慕人哋聯賽周日就煞科，大把時間備戰決賽：「決戰阿積士將會好難踢，佢哋係一支年輕、強大嘅球隊，而且本周末就完成聯賽。佢哋有12日備戰決賽，而我哋仲有3場英超秩序，亦唔係好多球員可用。」