【本報訊】「你係執返嚟嘅！」父母一時意氣用事而說出的傷人說話，卻是在留產所出生的德貞（Lina）和嘉寶，50多年以來最想聽到的一句真相。臨近母親節，溫馨、幸福的慶祝故事以外，城巿一隅亦藏有令人心酸的塵封歷史等被揭開。二人公開尋找生母，同時藉以鼓勵對身世有懷疑人士、或曾遺棄孩子的父母，勇敢面對問題，嘗試尋找、聯絡對方，一解心中鬱結，說一個故事，換一線曙光。
記者：黃翠儀
1960年3月18日在廣東道993號1樓留產所出生的黃德貞，早在12歲理應享受童年的年紀，因叔叔一句「你唔係姓黃」而在心中留下身世謎團。多年來即使奇怪母親少讓她和親戚接觸，但因害怕被打罵亦不敢向家人追問，耗費40多年才有勇氣跨出重要一步。2013年叔叔去世，她在喪禮上按捺不住問堂妹此事，未料對方毫不隱瞞，更詫異「佢哋冇話畀你聽呀？」回家後質問「母親」，養母首次承認並責罵「啲人應承咗唔講又講」，聲稱因不育而湊巧朋友有身孕才會「買肚」。
拿到真相的第一牌拼圖，她開始循出世紙上的留產所地址搜尋，從附近的店舖打聽到，當年為她接生的麥大姑已在數年前去世。回想過去被母親嚴苛對待，在難以感受到愛的家庭中成長，全因關係的開始源於錯誤，「𠵱家諗返起，其實好唔人道」；在22歲時結婚，也只為盡早脫離「父母」的枷鎖。她哽咽地強調，「親人係唔可以咁樣對待自己嘅子女……收養佢嘅家人會點對佢呢？可能比起冇書讀、冇飯食更慘」。
出世後被賣去深水埗的黃嘉寶，1966年8月1日出生於筲箕灣道288號1樓留產所，成長之路同樣難行。自懂事開始每天被母親打罵，曾發燒三日三夜仍不被帶去醫院，「每日問自己點解媽媽咁憎我，但又搵唔到點解，試過無端端一返去就畀佢除咗條褲扯出門口打」。自16歲開始養家，每日教琴工作13小時，最誇張是曾經每個月要付上2萬元家用，「講緊係廿幾年前，細個就係工人，大個就係提款機」，右手亦積勞成疾。
即使身邊的丈夫、朋友、同事都質疑她並非親生，但嘉寶始終未有面對真相，不斷勸自己「可能諗多咗箒，個個父母都係咁嘅」，甚至因不想連累丈夫、女兒而三度自殺，「到爆煲先發現自己有抑鬱，醫生話原來有咗好耐」。受病情影響令她和丈夫的家人斷絕來往廿多年，感嘆「當中好多嘢係錯過咗」。
24歲時曾偷偷到訪出世紙上的地址，但無功而回，直至前年緊急要用10萬元做手術，表姐立刻問她有否經濟困難，母親反而向表姐表示「佢有十萬蚊點解唔一早畀我」，終令她醒覺要追查身世，才得知在家族之間領養一事早已屬「公開的秘密」。現時坦白道出身世疑惑後，直言「成個人放鬆晒，我今次行咗呢一步，好似劃咗個句號」，她感激丈夫家人一直支持，見不到當然會有遺憾，但能否找到亦會隨緣，最重要是自己終於踏出面對真相的一步。她感激家人支持，因為尋親等於將個人資料公開。
人海茫茫，若能與生母相認，二人有甚麼心底話要盡訴？Lina想了解他們的近況以及自己有否兄弟姊妹，「我都會話佢聽現時我都ok，如果真係咁好彩搵到，我會介紹佢個孫畀佢識，我唔會恨佢，如果佢哋在世都至少80幾歲，我只係想見吓面，亦希望佢承認返當年的確係做錯咗」，強調任何原因下遺棄子女都是自私行為，「自己有咗BB，無論錯與對，係應該要承擔」。即使相見或無言，家寶亦希望能見面，「話畀佢聽你個女𠵱家幾好吖」，想知道為何生下自己卻又選擇遺棄，「由你唔要我嗰一刻開始，我已經喺地獄……但係當年嘅環境，可能佢亦都有苦衷」。她亦強調，為人父母一定要能負上責任才可決定生小孩，否則只會害了子女一生。
如有任何相關消息，或希望尋找生母、親兒，可致電9332 0424或電郵mailto:[email protected] 聯絡Winnie。
