香港田徑錦標賽2017今日同聽日會喺灣仔運動場舉行，噚日傍晚香港跳高一姐楊文蔚、里約奧運跳遠代表陳銘泰，同埋幾位嚟香港參賽嘅外國田徑好手喺灣仔場見傳媒。
楊文蔚近日跳出1米88，破晒香港紀錄，佢話期望可以穩定跳出1米86左右。而兩位外地選手，澳洲嘅漢娜祖兒（Hannah Joye）同泰國嘅雲尼達卜雲（Wanida Boonwan) 都曾經跳出過1米92，文蔚話目標唔係要喺主場攞金牌，而係做好自己，「佢哋都係高水平選手，我都控制唔到對手成績，反而希望自己可以應用訓練成果。」
跳遠方面除咗有陳銘泰之外，仲有三位中國男將參加，包括2014年亞運冠軍李金哲、里約奧運第五名王嘉男同2016年全國青年錦標賽冠軍石雨豪，陳銘泰就大讚佢哋係世界級運動員，佢哋可以提高香港錦標賽嘅水平同埋氣氛。