【本報訊】這年頭，做母親難，女人四十才晉身人母更難。現年41歲的張太姚鳳靈，今年才首次以媽媽身份慶祝母親節。兩條輸卵管塞了一條，復有5個子宮肌瘤逼爆，甫結婚已「恨」做媽媽，本已放棄，最終卻給她排除萬難，成就她夢想中完整的家。
「覺得係天賜嘅一份禮物，我哋兩個嘅媽媽都過咗身好耐，好多年冇慶祝過母親節，今年終於有機會」。張太與丈夫倆口子異口同聲。張太天生不是孕婦材料：「個子宮好細，輸卵管塞咗，機會已細一半，仲要好多個瘤。」至40歲，她已放棄。
不料就在她絕望時，體檢再傳來「壞消息」。「（去年）突然冇嚟M（月經），個人又好躁冇胃囗，我第一時間諗係咪提早更年期！」檢查確定，她與丈夫都不能置信。她記得，那是人人忙着捉精靈的炎夏，她摸摸肚皮，乳名就叫BB比卡超吧。
專業陪月變新手媽
張太本身職業就是陪月，有沙紙證明，生仔卻是新手。自確定懷孕，她即時上網「入谷」收料，一晚上千WhatsApp，群組70個準媽媽，數她年紀最大。「陀到6、7個月，好多高齡婦難產死嘅新聞，第一時間睇吓邊間醫院；最慘係年紀唔大都死，有個26歲女警流血不止，你話唔驚就呃你」。
上月，又爆出廣華醫院一名近五旬孕婦誕下孖胎死的悲劇，為何甘冒大險都要生？「我幾明白嗰種心情，咁難得先有咗，點可以唔要？好似我咁，醫生話子宮入面咁多瘤，可能會好痛，要返醫院打止痛針，亦有可能早產同大量出血」。
懷孕期間，她前往私院檢查，發現胎水多，BB唐氏綜合症高危；從無糖尿病，亦因檢查數字「踩界」，要見營養師。就連個肚都大過人！「成45吋，一般孖胎先會咁大，貼住喺子宮壁個肌瘤扯大咗，其中一個由5cm扯大到變10cm，好誇張」。
懷胎10月步步為營，到BB出世一刻，一樣飽食驚風散。「生完冇晒力，但BB竟然唔識喊， 打佢腳板都冇反應，我聽到個姑娘問隔籬嗰個：使唔使叫醫生？當堂個心離一離，真係BB唔喊我想喊」。等候喊聲的幾十秒，猶如半世紀。終於，BB放聲大哭，那一刻的感動，大抵只有歷盡艱辛的媽媽才能體會。「好期待星期日嘅母親節，終於以媽咪身份慶祝」。一家人食飯，切個小蛋糕，她說已很滿足。畢竟，人生大滿貫，得來不易。
■記者呂麗嬋