會德豐（020）主席吳宗權舊年喺股東大會上，因派點心券嘅問題，俾一名小股東問到口啞啞。噚日公司又舉行一年一度股東會，可能係見得傳媒多，日子有功，今次佢似乎做足準備，全程笑笑口咁回應小股東提問。
話說會上有位問題多多嘅小股東，拎住會德豐本年報，接連問咗吳宗權6、7條問題，上至公司回購股份、下至管理層薪酬等等。現場見吳宗權都好有耐性，盡量慢慢解答，至於一啲佢唔熟書嘅問題，佢都完美「交波」畀副主席吳天海同公司秘書，幫手解圍。
查實每年咁多上市公司舉行股東會，除咗有冇派息之外，好多小股東關心嘅，離不開有乜紀念品，好少見到有小股東咁積極向管理層提問。