距離卸任特首仲有個幾月，八方聽聞梁振英呢排推咗唔少公開活動，閉關專注稍後喺北京舉行嘅一帶一路論壇，皆因呢個論壇係國家主席習近平倡議一帶一路3年幾嚟，最高規格舉辦嘅論壇，有近30個國家元首或地區領導人出席，據知習大大高度重視，而梁特破格獲安排發言，可見受高度重視，難怪唔少政界話梁特呢排特別風騷，早前同建制派飯局，亦狂噴口水hardsell破例發言安排，慌死人唔知國家畀咗任務佢。
有建制中人話，政協副主席可以係無為花樽，亦可以係有為戰將，澳門前特首何厚鏵明顯要嚟擺，梁特就係作戰派，相信日後會喺好多推動中港議題上進攻，而佢亦力爭香港成為大灣區龍頭大哥，唔知夠唔夠牙力說服中央壓廣東？佢噚日亦同中山市委書記陳如桂見面傾兩地點加強喺大灣區嘅合作。