「和黃大班」馬世民（Simon Murray）同超人李嘉誠拜拜了！長實地產（1113）噚晚公佈，馬世民因其他個人事務，決定不再連任公司董事，即日退任獨董。
家陣大家一提和黃大班，多數只想到霍建寧，但其實李超人早於1984年搵來馬世民擔任和黃董事總經理，直至1993年，再由霍建寧接任。
馬世民背景傳奇，19歲覺得悶，一時興起加入法國外籍兵團，機緣巧合識到怡和大班，跟住幫怡和打工，負責售賣冷氣機及升降機，因而認識李嘉誠。後來馬世民離開怡和創業，李嘉誠就邀請佢做和黃大班。
馬世民跟超人一直保持良好關係，長實與和黃重組，佢2015年初再任長實地產獨董，至今兩年幾。畢竟馬世民都77歲，想有多啲自己時間都正常嘅。