港大理學院院務委員會早前通過取消天文、數學／物理作為兩個主修科，被唔少人批評向錢看，身為港大舊生嘅前天文台台長林超英亦好不滿，噚日喺電台節目話理學院呢個決定相當「低檔」，純粹因少學生報讀就要取消科目，只會令香港產業越嚟越單一，扼殺本港培育科研人才嘅機會，諷指「不如直接開間炒股學院啦，我包你有好多學生」。
林超英話大學應該保住唔同嘅知識，唔可以所有人都只係識金融，「學校唔係服務學生，係應該服務社會，學生入嚟係學嘢，港大𠵱家咁做完全係相反」，佢又話政府邊稱講求科技同創意，中小學又相繼開STEM課程，港大竟然殺咗呢科，根本係扼殺本港未來嘅科研人才。睇番吖，林超英本身就係港大主修「數學／物理」嘅畢業生，難怪對港大此舉動肝火。