肥仔W十幾年前考高考失手，又唔想重讀中七，於是入咗城市大學專業學院讀副學士，佢又懶於打聽升學資訊噃，到咗二年級先至知道可以憑好成績申請升上城大讀學士學位。因在一年級掛住做兼職，成績好一般，二年級發力追，為時已晚，於是攞咗個副學士就出嚟搵嘢做，好彩佢一早就打咗輸數，揀定搵工比較容易嘅電機/電工科，當人人都想做白領之際，佢就申請一間大公司做電機學徒，三年後已考到若干技術牌照，跳槽出去跟大判頭到不同地方開工如發電廠、機場、商業大廈等等積累實戰經驗。
依家點呀？肥仔W有啲同學大學畢業後，做咗建築師、工程師，肥仔W就做咗熟練技工，機電工程二判，搵銀冇人知，工程師同學嘅人工未必多過佢嘅收入，當今不少人批評副學士畢業等於失業，副學士搵學生笨，好可能係佢地嘅思維脫離不了讀書之後要穿白恤衫到中環返工之故！肥仔W話藍領服務業（水電維修便是一例）其實好難搵到工人開工，自己有時做到一頭煙，也希望多啲副學士走佢條路，升唔到上大學就無謂埋怨社會嘅錯，教育制度嘅錯咯，做技術工人係一條唔錯出路。
肥仔W得閒就去踏單車在新界周圍行，從淘寶買咗四五架單車，唔係在路邊俾人偷咗就係啲內地淘寶單車品質欠佳，俾佢一怒之下，丟棄咗。最近佢又買咗一架叫做高價單車，視之如珠如寶，但到目的地後，搵單車位泊車極之困難，順口罵梁振英之時（香港人以前塞車都鬧董特首，梁振英更俾人鬧得多），又大罵現時潮流興GoBee.Bike（即隨處隨地租單車，去到邊停到邊就可泊車鬆人），令肥仔W呢位單車車主泊單車極困難。GoBee.Bike有冇向政府交地租㗎，點解可以到處泊車，搶走晒單車位，令肥仔W呢類車主大感煩惱？佢一鬧GoBee.Bike啫，就與工程師同學鬧交，因為工程師A自己冇買單車，現在認為GoBee.Bike好好，好方便佢租車到處去。睇起嚟，內地江蘇省一間單車租賃公司Youon Public Bicycle System最近A股上市不成，據講與單車無鎖系統專利權有關，但用家與車主之間嘅紛爭亦可能有影響，呢類新興公司容易「顛覆」（例如沙田大圍租車檔）現時利益集團，大家明爭暗鬥，恐怕無日無之（如Uber與的士集團），如果唔係，點解城門河久唔久就有單車「被跌落去」？新式經濟模式正在不停衝擊舊的行為習慣及老牌行業，目前難以預料後果，新世代投資者鼓吹共享經濟之餘，社會人士亦要思慮公共政策如何應付。