個個議員嘅banner或者易拉架，周街都係，點至突圍而出？可能都要有話題或者夠搞笑，呢一點民主黨涂謹申近期可能有好深體會。話說教協總幹事馮家強近日行街，就俾阿涂嘅易拉架吸引，當然唔係因為上面嘅阿涂特別靚仔，而係標示阿涂議員辦事處嘅方法，好搞鬼，地圖上黑底反白幾粒大字標誌「九龍殯儀館」，唔知有冇街坊睇完啋啋聲？
八方問過阿涂，佢話議辦附近嘅地標真係九龍殯儀館喎，話過去巿民查詢時，同事都係咁樣介紹地址，但佢都認為易拉架咁展示地址，又係有啲唔夠敏感同「有啲怪」嘅，稍後會改吓。佢嘆自己九龍西議辦唔係喺風月場所樓上、就係喺殯儀館附近，「因為我嗰區奧海城冇商場可以租到，太貴嘞，我負擔唔起」，惟有揀舊區最平嘅位置開議辦，咁地理上就當然未必會係最理想。