繼今年初舉行親子跑之後，渣打（香港）再接再厲，今年7月首辦「渣打慈善家庭跑」。講明係家庭，梗係一家大細一齊跑，該行亞洲高級經濟師劉健恒（Kelvin），噚日就身體力行，帶同1歲囝囝Elliot同愛妻現身，準備參加專畀父母同5歲以下小朋友落場嘅400米「前世情人組」項目。
劉健恒太太阿Yan，原來亦係渣打同事，以前喺公關部工作，現任職行政總裁辦公室。Kelvin話，自己拍拖結婚到生仔，好多渣打同事共同見證，彼此一家人咁，佢仲講笑話，細路嘅教育基金（指出糧）都係靠渣打。
一帶一路高峯論壇，過幾日喺北京舉行。Kelvin出席慈善活動不忘抽水講爛gag，話呢排興講「一帶一路」，呢次慈善跑，佢就名乎其實「一帶一路」，即係一個大人帶住一個細路跑。哈哈，呢個gag爛得嚟都ok。