雖然係建制派箒，唔代表凡事都「一路向西」，逢中聯辦必撐。立法會前主席、民建聯曾鈺成就係一個好例子，可能因為夠晒江湖地位，所以夠膽講出真說話，面對中聯辦官員成日「危言聳聽」，曾鈺成亦不甘示弱反駁說出實情，噚日就撰文抽擊中聯辦法律部部長王振民，有網民質疑佢作反，但查實曾鈺成唔妥中聯辦，已經係建制圈公開嘅秘密。
王振民早前喺《基本法》研討會上話喎，若果一國兩制失敗，「國家損失的是面子，但香港損失的是裏子，是全部」，呢句說話曾主席聽落似乎相當哽耳，喺《am730》專欄以〈損失所有〉為題撰文寸爆王振民，形容有關說法「十分令人詫異」，指對方似乎係警告港人，若冇咗一國兩制，香港原有嘅嘢統統都要失去，但質疑一位中央駐港官員講呢啲，「是否對國家欠缺『制度自信』？」繼而諷刺指，或者佢係說出事實，「他不像有些人以為，香港由國家直接全面管治，會更加繁榮穩定，更加民主自由」。
網民：太空成作反
曾鈺成仲引述出席同一場合嘅全國港澳研究會會長徐澤話，一國兩制係國家改革開放國策嘅重要部份，反問：「一國兩制如果不幸失敗，國家損失的，真的只是面子嗎？……還是『裡子』？」直指王振民嘅說法邏輯上好奇怪，因為若一國兩制失敗，責任全在香港，係香港冇珍惜國家畀嘅機會箒，「國家沒有改變初衷，沒有違反承諾，怎麼會失面子？」
有網民多謝曾主席代出一口氣，另有網民質疑：「搞邊科？太空成作反了！」有建制中人話呀，曾鈺成向來唔妥中聯辦，不滿佢哋成日在港搞搞震，早前佢建議新政府於特首辦增設可以同中央溝通同諮詢嘅政治顧問，又強調駐港機構唔好介入香港政府管治事務，明顯就係衝住中聯辦而嚟，所以佢向王振民開拖，建制中人都唔覺出奇，但王振民就有可能感到不是味兒。
李八方