噚日又係一年一度「超人」李嘉誠fans聚會嘅日子，此話何解？咪就係長和（001）、長實地產（1113）舉行股東會囉。未去過都唔知，股東會上，最多人希望88歲嘅超人身體健康，繼續同大家開股東會呀。
fans祝身體健康兼狂集郵
好似喺長實股東會上，第一條提問嘅小股東劈頭就話：「祝李生你身體健康！」搞到超人不知幾開心，連聲話多謝大家支持。
雖然大會一直禁止影相，但會後超人都識做，企定定畀小股東影相，仲揮晒手咁，有中年師奶股東勁少女心咁話：「真係擺晒pose俾你影喎！」有位年約50歲嘅小股東仲係特登請假去開呢個股東會，話：「就係想聽李生講幾句」勁積極。
小股東們熱情難擋，仲關心埋長和員工嘅健康㖭。話說會上有小股東忽然提到長和旗下超市嘅員工，指佢哋切好硬嘅豬骨係「人力鬥豬力」，問超人有冇安全罩或切肉機提供畀員工；而且，超市女職員搬好大嘅箱，感同身受「腰到痛埋」，問公司有冇提供物理治療同提高職員安全意識咁㗎。
超人應該好少去超市，即刻交個波畀長和副董事總經理黎啟明回應，黎生話，一向好注重員工健康，當有新機器都會引入，保障員工身體係首要考慮云云。華華估計，在場冇乜邊個董事料到有此一問！
李華華
mailto:[email protected]