噚日睇完份報告，想像到瑞聲（2018）管理層喺季度業績會上點樣解畫。大家關心係咪造假？不如咁講，瑞聲經營模式、生意、賬目，甚至蝙蝠俠關注嘅關連公司問題，對於瑞聲嚟講，其實有合理嘅運作需要。
講緊係蘋果零件供應商，向來蘋果會披露供應商名單，但生產、研發內容絕對要保密。瑞聲有唔同廠房、生產線、產品線，仲要應付蘋果等大客嘅唔同要求，自然啲濕碎附屬公司越開越多。同時要為客戶保密，即係任何技術、蘋果線報都要掌握喺少數人手上，啲濕碎公司自然由管理層自己持有、打骰。針無兩頭利，我話係瑞聲業務性質所需，你亦可以話瑞聲透明度低，睇法看官自決。
其實瑞聲唔停牌、大大方方任你沽任你插，潛台詞係「驚都未驚過」。不過，在於股東層面，必定點都驚，尤其大把機構投資者低位買贏到開巷，唔介意減持降風險。
瑞聲係一隻高位未認真派過貨嘅股，就算係較壞打算，長線升勢見盡，股價都會再搶高，扮突破扮旗形扮乜利好訊號都好，升到接近高位先有機會派貨。況且只要將股價打上高位，大家就自然相信瑞聲冇問題。資本市場運作就係咁，平常心睇住發生乜事就OK。
晉佳
http://www.fb.com/advanceguy1
本欄逢周一、三、五刊出