塞爾特人要贏波，唔使次次靠晒主力I湯馬士（Isaiah Thomas）嘅。周三NBA季後賽東岸準決賽Game 5，綠軍喺主場再戰巫師以123:101大勝，場數領先3:2；湯馬士今場只係入咗18分，但隊友A巴特利（Avery Bradley）就貢獻個人季後賽新高29分。兩隊香港時間明早喺巫師主場進行Game 6。（樂視明日8:00am直播）
湯馬士喺東岸準決賽頭兩場主場比賽大發神威，分別入咗33同53分，今場返到地頭就手感一般，全場13射得五中。相反，巴特利第一節帶領球隊打出一段16:0攻勢，上陣30分鐘入29分，上半場已經拎25分；由於塞爾特人早就大比數領放，所以巴特利喺下半場冇乜需要落場。賽後湯馬士都要向巴特利致敬：「喺季後賽我哋需要佢，佢亦義無反顧，冇受傷勢影響，一落場就將傷患放喺場邊。」