雲格「前四狂魔」模式啟動！周三英超獨腳戲，阿仙奴作客踢「風流波」的修咸頓，上半場雖然有阿歷士張伯倫傷出，但換邊後憑「山神」阿歷斯山齊士同埋前鋒基奧特各入一粒，作客淨勝2:0，爭前四以奪下屆歐聯參賽資格，仍然有機！
賽後兵工廠以35戰得66分超越曼聯升上第五位，失分仍然比第三、四位利物浦同曼城多一分及三分，但爭逐前四仍然未絕望。難怪今季「反雲」反到出晒名嘅「暴龍哥」Troopz（小圖）都變「尚書大人」，賽後亦笑晒口咁話自己估中2:0波膽，仲竟然讚領隊雲格令球隊下喺半場脫胎換骨！佢又大讚阿歷斯山齊士嘅入波夠晒「卡士」，令而家爭前四嘅情況wide open，大把可能咁話！至於雲格亦話：「我從來冇懷疑過己隊嘅性格，我哋只能夠做好自己贏晒餘下比賽，由周日到今日都交出硬淨演出，繼續落去啦。」