雖然候任特首林鄭月娥仲未宣佈新班子人選，但好肯定嘅係教育局局長吳克儉冇得留低；至於邊個接任？坊間盛傳副局長楊潤雄（Kevin，圖）有機會升呢，《星島日報》噚日亦話林鄭屬意楊潤雄坐正，稍後會聯同其他落實出任司局長嘅人選，一併提交中央政府拍板。
唔夠硬淨 傳非奶媽首選
政圈一直盛傳Kevin非林鄭嘅教育局局長首選，皆因傳Kevin為人較柔及冇表現硬淨一面，之但係教育界卻力挺Kevin接棒坐正，覺得佢過去表現唔錯，至少較吳得掂有誠意兼肯溝通，立法會教育界議員葉建源都讚Kevin表現「穩陣」兼「有得傾」。
唔知係咪因為唔夠腳，據知林鄭亦認同畀Kevin坐正。現年54歲嘅Kevin，香港大學社會科學學士及澳洲皇家墨爾本理工大學工商管理碩士畢業，佢畢業後喺商界打滾過，先喺1992年加入政府，5年前成為教育局副局長。對於係咪升呢坐正局長，八方有問過Kevin，佢回覆「不予置評」。