眾所周知，兩個歐洲練馬師孫達志同胡森今季都冇牌離開香港，佢哋散倉後全部原有馬匹都要離巢，部份枕住有好表現被譽為寶藏馬，有啲就跑極唔識贏，搞到新接手馬房一籌莫展。
六歲馬「盈喜悅」本屬後一類，舊年暑期從孫達志加盟文家良旗下，今季原本11戰只兩亞一季，堪稱屢戰屢敗。不過，幕後冇氣餒，「盈喜悅」這晚（10日）夥拍45歲騎師杜利萊出爭谷草頭場五班1000米，沿途守四五位，半條直路後上以頸位之先，氣走放頭馬「跑馬仔」，一併打破今季及轉廐後頭馬荒，單Win及組合獨贏A2分別派79.5及29元。
「盈喜悅」閘前着綠燈一擊即中，落飛黨贏咗筆大錢，同時帶俾文家良季內第13場頭馬，再贏多三場就可達到續牌指標上岸。呢次亦係文家良季內首度與杜利萊合作贏馬，杜利萊今季暫有16Win，其中十場都在谷草勝出。
已守齋約一個月近況低況的文家良表示，「盈喜悅」今仗4檔非常好，馬兒狀態很弗，杜利萊轉彎後落力催策，發揮出色應記一功，文家良又話自己會努力爭取頭馬，奮力追數。
值得一提是此場大熱2.5倍潘頓座騎排1檔之「欖球鑽石」，起步大慢閘，結果後上姍姍來遲只輸0.5馬位跑梗頸四，馬迷一殼眼淚。原來連同此駒，潘頓上季至今23匹谷草1檔座騎未贏過，大部份是熱門分子下，只得1亞4季，未知是巧合抑或其他。而潘頓這晚還有第六場「幸運飛駒」排1檔，且看表現如何。
頭場二至四名分別為「跑馬仔」、「天狼星」及「欖球鑽石」，四重彩派一萬蚊鬆啲。