港交所（388）一年一度盛事──LME亞洲年會噚日舉行，最令人期待係晚宴部份，事關年年都有主題，好似占士邦、法國紅磨坊，現場佈置同表演環節都會配合番晒，舊年悶啲都有一帶一路做主題，但今年竟然係無．主．題，令人好失望啫！
噚晚有1,800人出席，比舊年多100人，係活動舉辦5年來最多人。港交所行政總裁李小加解釋番，話今年係LME140周年，所以冇設特別主題，佢亦冇上台表演，「免得一動起來，股價也會動」，認真用心良苦。
財經事務及庫務局局長陳家強亦有出席，見到佢，大家當然問佢會否留任熱廚房喇，佢又出絕招，笑住反問記者有乜行情，又叫大家問同場嘅財爺陳茂波同港交所主席周松崗仲好喎。
佢指，近月工作排得好滿，周末會上京參加一帶一路研討會，未來一個月會外訪兩三次。