睇番曼城領隊哥迪奧拿（圖）今季講啲嘢，真係有種阿仙奴領隊雲格嘅感覺。雲格每逢季初就話球隊有能力爭標，但整整吓成績轉差，就會轉口風，到最後變成第四名就係最大嘅勝利。
哥迪奧拿曾經講過，冇錦標嘅球季就係失敗，原話繙譯咁：「如果我冇冠軍，我唔會喺度留得耐。冇錦標就唔係一個好球季，我喺八月就知道呢個現實，做領隊就係要睇成績。」不過冇耐，哥帥開始轉口風嘞，佢話：「我從冇講過嚟到曼城會贏錦標，我冇講過要贏三冠王、雙冠王，我從未咁講過，就算我喺巴塞隆拿教波嘅第一日都冇咁講過。」
的確，你係冇承諾嚟到曼城會贏冠軍，但你有話冇冠軍就係失敗喎。
咁跟住見到四月一號有篇報道，應該唔係愚人情新聞啩，哥迪奧拿話入前四好似贏冠軍一樣，「喺呢度，肯定係，我唔係話入前四重要過英足盃，但真係好似贏冠軍一樣，因為要同好多強隊競爭。」過多一排，哥迪奧拿再講：「歐聯資格好重要，若果攞到的話，我喺曼城嘅第一季就係重大嘅成功。」由無冠等於失敗，到從無承諾奪冠，再到入前四等於贏錦標，最後係入到前四就算巨大成功。根據哥帥嘅邏輯，曼城無冠，今季唔係好球季，不過如果入到前四就係巨大成功；真係好語言偽術。
呢啲說話其實反映到哥迪奧拿對英超嘅輕視，但後尾發現大件事，球隊成績唔似預期。喺舊年10月，佢曾經講過英超對抗嘅激烈程度比唔上西甲、德甲，相信家陣佢肯定唔夠膽咁講。
文：咖喱