月底就係端午節，當日除咗有龍舟睇，6月2日至4日喺維港及中環海濱，仲會有旅發局嘅龍舟嘉年華。
旅發局總幹事劉鎮漢向八方透露，今年嘉年華加咗撐本土嘅元素，最特別梗係當中周六及日，14架美食車會首次齊集，市民旅客唔使走晒咁多地方，可以一次過盡享全部美食車特色美食。
據知唔少美食車主都想喺大時大節聚埋一齊，覺得對市民吸引力會大啲，似乎呢次係一個好時機。
至於其他節目都有撐本土文化，包括現場設有由4個貨櫃組成嘅巨型塗鴉牆，由社區藝術團隊Smile Maker操刀，佢哋曾經幫九記牛腩等老店繪畫鐵閘。
旅發局8月仲會搞電競比賽，劉鎮漢話明，想搞一個香港主辦嘅賽事，而唔係其他國際賽事嘅分賽，而且獎金一定要夠吸引力。