學界精英游泳比賽噚日喺體院游泳館上演，林大輝中學嘅蛙泳好手常鈺涓奪得兩金，而一眾考完DSE嘅泳手都游出唔錯成績，為復出打一支強心針。
九華嘅孫為倡就以24秒08稱霸男子50米自由泳，佢頒獎後急急腳走，原來要趕去考口試。佢停水半年後，上星期先復操，時間（24秒08）都只係比個人最佳慢半秒。而女拔背后黃筠陶復出喺50米同100背泳游到30秒53同1分06秒49，攞到一金一銀。停操近四個月，佢笑住話攰到無力游接力，「太耐無比賽，落水嗰陣感覺奇怪。我停水時睇到隊友post比賽相，自己都好想游水。」
至於常鈺涓喺女子100米及200米蛙泳分別游出1分10秒44和2分34秒43，不過佢就話自己成績一般，「上星期做體能同衝強度，狀態冇想像中好。」林大輝中學喺沙西區，佢話係首次喺學界賽同其他港九泳手較量，不過其實全部都熟口熟面，平時都會一齊比賽。
平時D1學界萬人空巷，今日賽事嘅觀眾投入程度雖然難比D1，但係聖若瑟嘅啦啦隊都有專程撐場打氣，幫手帶動全場氣氛。