每年長和系股東會都有好多長情股東捧場，長和重臣霍建寧原來好識冧小股東，搞到有小股東即場建議「小超人」李澤鉅派10億元花紅畀佢㖭呀。
噚日係電能（006）與長建（1038）舉行股東會，身兼電能主席嘅霍建寧心情勁靚，遇到小股東刁鑽問題，唔介意答，仲要大放笑彈。
將蔡肇中讀成葉肇中
話說電能股東會上要重選多位董事，有小股東開口想認識董事，霍建寧就由執行董事甄達安起逐個點評，好似介紹甄達安時話「好叻㗎」、獨立董事葉毓強就係「出名嘅banker」，不過佢竟然將行政總裁蔡肇中，讀錯做葉肇中（「菜」同葉差唔多？！），仲要話番對方「佢個名好難讀！」認真搞笑。
去到尾要介紹老闆仔李澤鉅，霍建寧問小股東「使唔使（李澤鉅）起身呀？」李澤鉅已經好識做，笑住口向股東們欠一欠身打晒招呼，冧到成班小股東拍晒手掌。
開會開得咁高興，有小股東仲即場建議小超人要派10億元花紅畀霍建寧（佢舊年已袋兩億），霍建寧又再妙問妙答，反問股東有冇睇過近期人氣嘅內地政治反貪劇《人民的名義》，話「咁唔得㗎！」
講開又講，小股東有條問題，大家可能估唔到，就係點解唔畀大家影相？霍建寧都認真答喎，指開會就咪影喇，李澤鉅就話係秩序問題，「你可能想影我哋，但你隔籬嗰個未必想俾你影」。
李華華
mailto:[email protected]