體壇拾趣:寶查不留手挫「騙子」

體壇拾趣:
寶查不留手挫「騙子」

加拿大靚女網球手寶查早前曾指舊年喺澳網未能通過藥檢被禁賽15個月、最近刑滿復出嘅俄羅斯球手舒拉寶娃係「cheater」(騙子),而寶查喺馬德里網賽女單次圈更如願對住舒娃,而經過兩小時51分鐘嘅較量之後,寶查以2:1力克舒娃,將會同德國嘅姬芭喺第三圈交手。男單方面,巴塞隆拿球星碧基去咗捧老友費利場,睇呢名西班牙手對烏克蘭古古舒堅嘅首圈戰,點知因球迷發現咗碧基而狂噓佢,搞到比賽一度要暫停。好彩,費利最後以2:1反勝晉級。