幫林鄭助選嘅三十會召集人、大律師李律仁（Laurence），不時有人傳佢做局長、司長，甚至係行會成員，噚日佢以金發局小組召集人身份出席記者會，被問到個人仕途有冇轉變時，佢斬釘截鐵咁重申：「無，繼續做番大律師。」
Laurence話，「由衷地講，年資尚淺，第二我真係好鍾意做大律師嘅工作。」至於擅長金融案件嘅佢，有冇份加入林鄭開設嘅金融領導委員會？佢就謙稱話：「唔到班，嗰個好高層㗎喎。」
講到噚日發表有關於金融科技嘅研究報告，Laurence話睇咗研究報告好多次，先慢慢入到腦，可能因為自己從事嘅法律係古老行業，所以吸收新知識比較慢。
會上，佢又分享咗個故事，佢話九十年代喺美國讀大學，要學用電郵，雖然好悶，但都要學，但𠵱家電郵已經out埋，相信WhatsApp都會係同樣命運，因為金融科技會改變世界咁話。