今個星期五晚，公民黨同新民黨都有黨慶，前者有晚宴籌款、後者則只搞cocktail，時間撞到應一應，唔少政界中人都要兩邊走。而公民黨為咗佢哋嘅11歲生日，傾盡全力慶生兼籌款，搞到「削肉」、「保育」大對決，由黨魁楊岳橋領軍嘅「削肉救黨隊」，方法係「點水食生菜」，表明籌到幾多錢就減幾多磅，名副其實黨債肉償。
黨魁一言既出，其他黨員自然要響應，好似民航機師譚文豪，最近「扮」做運動不遺餘力，皆因被人話身形似水桶而被戲稱「桶豪」嘅佢，早前拍片話去大浪灣滑浪減肥，查實……只係喺鏡頭前做吓樣咋喎！
一個救黨 一個救港
至於同岳少對戰、由前黨魁現主席梁家傑率領嘅「保育救港隊」亦出片還擊，袋巾由慈雲山行到水泉澳邨，邊行邊執垃圾兼大講保育知識，話如果做好保育郊野公園，財政司司長陳茂波就再冇藉口話郊野公園生態價值唔高賤賣喎！
講完一大輪，其實呢個「保育救港」行動都係黨慶籌款項目之一，佢話如果累積籌到20萬，就會同隊員包括余若薇、陳淑莊等人，齊齊以神秘造型行獅子山，實行你捐錢，佢出力，用行動清理郊野公園垃圾呀。
公民黨除咗「內鬥」，面對外來挑機一樣無難度。該黨兩個區議員余德寶、伍月蘭前晚參加煤氣公司嘅鬥快包糭比賽，包攬第一同第二名。余德寶笑言包糭4年終於學有所成，憶述當年係伍月蘭傳授包糭要訣，估唔到家陣徒弟仲叻過師傅㖭！查實余德寶都係削肉救黨隊一員，佢話包完糭都要忍忍口，皆因「減磅尚未成功，寶寶仍需努力，晚宴主力食菜」。
李八方