喺韓國育兒節目《超人回來了》中勁受歡迎嘅「國民三胞胎」大韓、民國、萬歲，目前已經5歲成為大哥哥開始返學喇。雖然三胞胎已經退出節目，少咗機會同粉絲見面，不過老竇宋一國都好識做，不時透過Instagram更新三胞胎嘅近況。
雖然喺香港，父親節同母親節係分開，但韓國文化中，前日係韓國特有嘅法定節日「父母節」，係為咗感謝父母而設立嘅節目，所以身為子女都會送上康乃馨畀父母，表達對父母嘅愛。
為咗父母節，三胞胎亦喺學校學點樣整一束小型嘅康乃馨花束，更寫上想對父母講嘅說話，包括「爸爸媽媽我愛你哋」、「媽媽，多謝你生我哋出嚟」等，十分有心思。而第一次收到康乃馨嘅宋一國就將囝囝嘅製成品上載到IG，似乎佢都相當感動，不過影相時萬歲繼續其搞鬼嘅個性，嘟起嘴派飛吻，認真可愛。