早前3月17日「香港國際馬匹拍賣會」，由日本城老闆劉栢輝以1,050萬投得，成為本港史上最貴拍賣馬的「家品皇者」，已加盟沈集成馬房備戰一段時間。
3歲澳洲馬「家品皇者」經過個多月輕鬆操練後，今日踏入另一階段，首次試閘，由潘頓出試沙田第四組1000米草閘。沈集成對這匹貴價馬非常緊張，「家品皇者」出試前後皆有傍實打點一切，顯得一絲不苟，不容許出錯，試完亦與潘頓傾咗好耐才離開，騎練對此匹四班馬的招呼，分分鐘仲好過一隻頂班名駒。
講番「家品皇者」，這課大閘早段居後，末段稍為上前第五名過終點。此駒雖然身價不菲，但晨操專家積奇指馬兒今課慢閘，而且騎落顯得有點重身，步伐不太勁，看來暫時狀態麻麻。不過，「家品皇者」與在港10捷剛贏冠軍一哩賽的「詠彩繽紛」同父，此系馬向來較遲熟，今課試閘一般並不代表質素欠佳。