【母親節系列之上天恩賜】單親媽媽趙哲妤（Uny）去年未婚生女，囡囡跟她姓趙，取名趙真羽，乳名「小魚」。雖然曾跟不少富二代傳緋聞，但Uny強調男友只得一個，就是小魚的生父！惟當初決定生B，並不是想挽回男友，Uny說：「大家感情有條刺，𠵱家仲好深，點解要一個女仔面對咁大問題，自己匿埋風流快活，呢個小朋友係我，我會負責。」
「前世欠咗佢」
提到小魚生父，Uny自嘲：「前世欠咗佢，佢對唔住唔係我，佢對唔住小朋友，對唔住自己，佢唔面對，話落咗佢！嗰時自己有衡量過，一係面對，一係逃避，我都有諗過，咁大個人有膊頭，要正面面對，乜事都可以克服。」決定做未婚媽媽後，Uny喊過無數次，擔心自己有產前抑鬱，她說：「因為大肚時會情緒波動，好容易唔開心，每日起身想喊，點算呀？可能未結婚生仔有孤獨感、空虛感，好需要另一半陪伴，生咗之後，就算冇異性或朋友喺身邊，你都唔會空虛，小朋友做咗你生命嘅寄託，係一個上天恩賜。」
缺人生目標
成為人母後，Uny覺得自己的生命才開始：「讀完書，人生目標就係吃喝玩樂，𠵱家唔同，好似幫緊第二個人去計劃人生，全部嘢重新來過，之前我欠缺人生目標，有咗小朋友係人生勝利組正式開始，感覺到喜悅係由心而發，學識無條件付出，以前覺得好愛呢個男人，但𠵱家先真正知道乜係愛。」
不過，懷孕期間Uny跟家人關係出現問題，有次大家吵架，媽咪提議她搬出去住，生完才返家，Uny說：「百日宴媽媽都送咗金鈪畀小魚，又買兩條裙畀佢，其實有咗小朋友，令屋企有更多生氣，多咗好多話題，幫咗我同媽咪關係，幫埋我哋屋企，所以呢個小朋友都係一個小福星。以前自己入廚房洗碗嘅經驗都冇，𠵱家慢慢學，反而覺得好有挑戰性，『女子本弱，為母則強』女人天性係咁樣。」
撰文：楊潔雯
攝影：林德雄