據一個國際汽油價格監察網站資料，截至4月20日，香港汽油每公升售價1.96美元，約港幣15.3元，屬全球最貴，較世界汽油平均價超出近78%。
香港汽車用汽油咁鬼貴，可能與汽油稅有關，現時每公升無鉛汽油要抽稅6.06港元，即係佔上述每公升油價之39.6%，如果唔計油稅，每公升油價係9.24港元，大約等於1.18美元，只係比世界平均汽油價高出8.2%啫，唔算多，如果計埋好多國家有汽油津貼呢回事，香港汽油價更加唔算係貴得離譜。
引用上述國際比較數字就係咁睇。競爭事務委員會發表一份「香港車用燃油市場研究報告」，指汽油市場無證據顯示有合謀定價行為，但五間油公司只係出售價錢貴啲嘅「辛烷值98汽油」，唔賣便宜啲嘅「辛烷值95汽油」，係事不尋常咁講，左丁山不懂科學，唔知辛烷值98與辛烷值95之分別，從消費者角度出發，用較便宜汽油而汽油效能不致大幅度降低，當然有着數。但從汽油市場角度出發，香港只有五個不同招牌油站，較貴汽油冇受到抗拒喎，油站點解唔賣貴油而賣平油？除非政府立例規定所有油站必須同時供應上、中、下價三種不同無鉛汽油，否則嘅話，在只有少數業者嘅市場，大道理就係只賣上價一種。
於是乎就會引發競爭之討論，競爭事務委員會話市場欠缺競爭喎，令燃油價格偏高，咁又計將安出？根本係冇計！點解冇計？第一，本港地方細，油站要投標，價高者得，間油公司唔轉嫁地價（分期地租）俾消費者就有鬼，據運輸業名人蔣志偉在now TV講地價令油公司汽油增加兩蚊。於是乎，油稅6.06，地租2.0、一公升汽油坐底要賣8.06，再加汽油進口價3.78（競委會之2017年2月數字），每公升要賣11.84元，賣零售價15.06元嘅話，毛利率係27.2%，再扣埋燈油火蠟工人薪資等等各樣使費，純利率可能在10%或以下，同翠華茶餐廳差不多啫。競爭事務委員會呢份報告原來係為油公司平反，反映消費者委員會過去指控油公司將「油價加快減慢」係不成立嘅！
最近左丁山先至注意到最接近紅隧嘅美孚油站進行大裝修，即將由中國石油接管，即表示中石油高價中標，趕走經營多年嘅美孚，獅子山隧道外嘅加德士油站亦早由中石化接管，啲大央企銳意出高價競投油站嘅情況，將來一定有增無減，中資代替美資搶佔本地零售汽油市場，已成趨勢，汽油價邊度會下調吖，競爭事務委員會靠邊站可也。