勇士不讓騎士專美，周一NBA季後賽西岸次圈第四戰，憑後衞史堤芬居里（Stephen Curry）攻入30分，作客121:95輕取爵士，以場數4:0出線，與騎士喺東岸連續兩圈橫掃對手晉級睇齊，創出NBA歷史。
兩岸齊贏8:0創歷史
居里上仗對爵士手感麻麻，三分球命中率更只得27.3%，好彩今場狀態回勇，第一節已大幅領先39:17。雖然輸波就會出局嘅爵士力追，但每每拉近到個位分差，就俾勇士拉開番，認真洩氣，結果勇士大勝26分，居里除咗入30分，仲有七助攻同五籃板，前鋒祖蒙特格連（Draymond Green）就貢獻17分11助攻10籃板嘅「大三元」。居里賽後就話：「我哋充滿天才，只要我哋不斷傳波，創造空位，就可以搵到好嘅出手機會。」
勇士同騎士同樣以首兩圈共8:0嘅絕對優勢晉級岸區決賽，係NBA首次，其實1989年都試過兩支東西岸球隊頭兩圈橫掃晉級，分別係活塞同湖人，不過當年季後賽首圈仲係五場三勝制，佢哋以7:0姿態晉級。最終兩隊都打入總決賽，活塞更加再以4:0橫掃湖人捧盃。
其實勇士快刀斬亂麻出線，唔單止為紀錄，而且可以爭取更多休息時間；NBA公佈咗西岸決賽賽程，勇士有至少六日休息，相反另一邊線火箭同馬刺𠵱家打成場數2:2，如果佢哋要打到第七場，西岸決賽就會喺16號舉行，勝方就只得兩日休息。
此外，火箭周一宣佈，巴西中鋒尼利（Nene）因左邊內收肌撕裂，將無法在今季餘下的季後賽上陣，提早收「咧」。