長實地產（1113）「樓神」趙國雄之子趙朗（Ronald），除咗做里昂證券房地產基金香港區揸弗人之外，仲好有生意頭腦，之前同其他朋友合作喺銅鑼灣開咗間酒吧PONG。估唔到間酒吧開業年半，生意咁快上軌道，今年仲會殺入中環ifc開分店，又會進軍台北。
PONG喺2015年底開幕，Ronald話佢係30個股東其中之一，夾少少份，自己就將里昂揸住嘅銅鑼灣耀華街「Zing！」1樓全層租畀PONG，做第一間店。間酒吧嘅賣點係有得玩Beer Pong（投杯球），兼有電子計分枱，吸引年輕客群。
ifc開分店吸上班族
PONG開業時撞正香港零售業低迷時期，不過間吧未夠一年就回到本，較預期快，所以今年就決定大展拳腳開分店兼衝出香港。
Ronald講，已經喺中環ifc 4樓平台花園層租咗間舖，遲啲就會開第一間分店。新店除咗目標中環上班族之外，仲要係營業時間冇限制，可以好似銅鑼灣咁開到好夜。而台北新店就已經裝修好，上個月已經試業。
除咗生意經，Ronald都好關注樓市，話目前樓價太高冇乜投資價值，反而如果租緊樓又負擔到就唔怕買，同樓神阿爸口徑一致。講開買樓，原來Ronald一直未買樓，仲保留首置資格，將來入市可以畀低稅率。
李華華
mailto:[email protected]