《不懂撒嬌的女人》大前晚嗰集，就有「懂得撒嬌的女人」出場喇，就係王浩信嘅表妹張瑋純喇，佢就做返佢自己，即係一個台妹，大家都知台妹撒嬌有一手，所以佢一出場，就已經完美表現「懂得撒嬌的女人」，嗲到王浩信同佢啲朋友冧晒。
但嗲功有幾勁，就要講前晚嗰一集喇，因為佢同港女唐詩詠相遇，一個唔識撒嬌、一個識得撒嬌，一比較之下，真係高下立見，劇情仲要講純純教唐詩詠撒嬌，唔識撒嬌嘅女人，睇前晚嗰集就真係學到嘢喇，嗰啲輕輕嘅身體接觸，加埋嗲到爆嘅疊字，真係少啲功力都頂唔順。
前晚除咗有嗲功睇之外，仲有就係王浩信同唐詩詠嘅感情線開始萌芽，先係兩個一齊遊台南，唐詩詠攰得濟瞓着咗喺王浩信膞頭，王浩信仲好man咁幫唐詩詠擋太陽，可惜唐詩詠瞓咗，如果唔係實冧死啦，之後唐詩詠睇到宣萱畀王浩信嘅同居協議書，紙上面王浩信仲寫咗啲字，睇完唐詩詠又甜笑咁，不過依家先第8集，唔知之後佢哋嘅感情會遇到咩問題呢？