電影《29+1》今個禮拜上映，呢排臉書都出現唔少以下hashtag，#好驚嫁唔出、#捱一晚夜自覺老三年、#心態很重要、#輕熟女、#三十而立...等。女人踏入30歲，係咪真係會出現某啲特徵呢？怕凍？怕通頂？怕慶祝生日？反而，唔怕睇中醫？舞台劇演員麥智鈞(Melodee)同舞蹈員阿Ling都異口同聲話，「有啲唔想認，但又真係喎！」
Melodee同阿Ling今年都29+1，30歲，有人會話已經係「中女」，不過佢哋就話唔覺得自己老，Melodee笑住話，「好彩未有人嗌我做Auntie！」的確，兩位女士外表都唔似3字頭，不過身體就有響起警號。Melodee話唔知點解3字頭，個人變得容易病，亦難啲好返。阿Ling就話為咗保養身體，28、9歲已經戒凍飲，仲話鍾意睇中醫調理身體，「真係唔怕苦o架喎！」佢哋都話比以前更怕凍，坐巴士、地鐵、入商場等都會「寒一寒」，一定要帶件外套出街。
除咗保身，仲要護膚，阿Ling話會買貴啲嘅護膚品，「呢啲錢唔好慳喇！」Melodee都話今年就買咗部「碌面機」。為咗保持個樣精神、唔好殘，真係唔捱得夜，Melodee話，「唔好再講通頂呢兩個字！」
唔少女仔嘅目標係30歲或之前，踏入人生另一階段－－結婚！不過，Melodee同阿Ling目前都係單身。阿Ling話人大咗，唔再介意自己一個人食飯，無細個咁怕寂寞。佢喺26、7歲嘅時候分手，「嗰時一係繼續落去，即係結婚，一係就分手，咁我就分咗手。」佢都坦白承認30歲後難搵對象，筍盤都畀人mark晒，不過仲有其他可能性，「呢個年紀係一定會遇上姊弟戀，我唔太睇年齡，主要睇夾唔夾。」佢話身邊都有朋友係姊弟戀，結埋婚，「個女仔仲可以照顧返個男仔，呢個係30歲女性嘅優勢！」
至於Melodee就喺2015年分手，之後專心事業，舊年以自己嘅失戀經歷，自編自導自演一輯舞台劇《30歲前的一晚我失眠》。Melodee話結婚對佢嚟講唔重要，唔會為咗要結婚而搵對象，一段關係最重要係相處融洽。佢話今年想試吓One Year No Dating，收兵、flirting等乜都斬纜，畀時間學習愛自己，「經歷過咁多次失戀，係需要休息，檢視吓以前嘅經驗。」佢話唔驚呢個計劃會錯失對的人，「如果係Mr.Right，始終會遇到！」
《29+1》有句對白，「女人，年紀越大，條件就越少o架喇！」但係Melodee同阿Ling都覺得，女人先有條件任性同追夢。阿Ling話揀得做Dancer，追求嘅係心靈上嘅滿足，「每一個機會都係一個突破，或者對自己嘅要求可以不斷提升。」又話3字頭未結婚嘅女仔，應該都有份任性，「如果我係男性嘅話，要負擔一頭家，就未必可以咁樣一直任性落去。」
Melodee作為舞台劇演員都有同感，「尤其喺香港做藝術、舞台工作，一定要瞓身，我希望踏入40歲嘅時候，當我回望呢十年，會覺得係值得，值得我放棄談戀愛嘅時間！」
場地提供：SDI Media Hong Kong、Bedrex
記者：鄒倩婷（阿仙）
攝影：峰、Neo
剪接：Roy
編審：陳家文