上市公司每年一度股東會，小股東除問問題，最關心係有乜紀念品，仲派點心禮盒、西餅券？out喇！
話說泓富產業信託（808）噚日喺置富都會舉行股東會，公司事前寄信畀小股東，除咗通知開會日期，仲寫明每名出席者將獲發紀念品一份，可能因為咁，今年特別多人，登記入場都打晒蛇餅，現場有600人，比舊年多一倍。
有小股東即場同主席趙國雄講，叫公司唔好再派西餅券畀小股東，皆因老人家食太多糖份對身體唔好，又要求派百佳禮券，實用啲咁。呢位仁兄其實都幾有道理，環顧全場，好多都係老友記，唔少係IPO揸到今日。
趙國雄好似一早知道小股東唔like餅券，泓富今年竟然轉派鴻福堂（1446）湯券！據聞鴻福堂喺泓富廣場有辦公室同商舖，同事成日路過諗到呢條橋，成本跟餅券差唔多，股東反應似乎唔錯，睇嚟其他公司可以參考下。