白雪仙今年90大壽，中大圖書館特意為佢舉行「九十風華帝女花—香港中文大學圖書館任白珍藏展」，展覽唔只有多張任、白嘅舞台劇照，仲有仙姐後生嘅泳照，相中嘅仙姐青春可人，仙氣十足，笑得燦爛，電死唔少人！展覽亦有任姐同仙姐遊山玩水嘅相，佢兩個仲試過喺牡丹亭即興演出。
展覽5月14日至7月31日免費開放，更會首次公開展出仙鳳鳴劇團泥印本劇本，因為技術所限，當時每次只可印製十幾份劇本，係台柱等主要工作人員專用，極度珍貴。同場亦展出10件仙姐演出時戴過嘅點翠頭飾，既記載仙姐回憶、亦保存傳統手藝歷史。
展覽廳排出10幅仙鳳鳴劇團演出劇照，其中一幅係《蝶影紅梨記》劇照。展覽策展人黃秀蓮話，為咗紀念唐滌生百歲誕辰，今年7月任白慈善基金將會公演《蝶影紅梨記》，仙姐仲會擔任藝術總監，大家又可以回味粵劇經典！