周秀娜、鄭欣宜、蔡瀚億（BabyJohn）同導演彭秀慧等前晚喺銅鑼灣時代廣場出席電影《29+1》慈善首映，容祖兒以神秘嘉賓現身撐彭秀慧，佢仲語出驚人：「你哋夠膽請個票房毒藥嚟撐場！」
欣宜亦邀得爸爸鄭少秋嚟睇佢首次孭飛做女主角嘅電影，又攬住爸爸互錫臉頰，激動到眼濕濕：「爸爸話『自己個女第一次做女主角，一定要嚟』。」欣宜喺戲中同BabyJohn有咀戲？佢話：「我大人嚟㗎，我就嚟『29+1』，拍時有啲尷尬……」秋官就話：「做戲啫，大個女喇，佢係女神嚟！性唔性感都要睇本錢嘅。」
想入股公司
欣宜話早前影到同佢一齊食飯嘅「大隻吳卓羲」只係中學同學，對方有女友，只係想入股欣宜嘅公司，欣宜話識太耐冇發展空間，娜姐則搭嘴：「有啲嘢好難講嘅。」欣宜回應：「咁我介紹你識啦。」娜姐抗拒對方有正印。娜姐今個月22號就踏入32歲，問佢生日願望係咪想快啲搵到男友？佢話：「未諗呀，邊有咁快搵到。」
撰文：馮仁昭