本港家族企業話事人大抵都唔鍾意退休，年近90嘅長和（001）主席李嘉誠、恒地（012）主席李兆基、銀娛（027）主席呂志和唔在講，東亞（023）主席兼行政總裁李國寶早前都話要做多3年，起碼做到82歲，大酒店（045）主席米高嘉道理亦都話，佢爸爸工作至94歲，去世前一日仍照常上班。
大酒店噚日舉行股東會，小股東關心公司嘅傳承問題，畢竟米高嘉道理已經75歲，佢又唔似其他家族企業，近年陸續介紹自己仔女畀投資大眾認識，孖屐真係唔知道佢嘅繼承人係點樣樣。
指父去世前仍上班
米高嘉道理就笑笑口話，佢爸爸Lawrence Kadoorie作為前任掌舵人，去世前一日仍然照常上班；佢指，只要自己仍然健康，能夠作出貢獻，就打算繼續打理公司業務。而且佢有3名子女，其中年約30歲嘅長女Natalie同細仔Philip近年已經加入公司，正在熟習環境，Philip仲去咗北京學普通話㖭。
講開又講，大酒店嘅小股東確係關心呢間公司，除咗傳承問題，亦有小股東對於公司計劃去到土耳其伊斯坦堡投資感到奇怪，因嗰度接近伊斯蘭國（ISIS），巧危險；米高嘉道理回應話，公司有超過150年歷史，經歷過兩次世界大戰，土耳其吸引到大量遊客，相信唔會太受到ISIS影響咁話。
李華華
mailto:[email protected]