中國三大男高音莫華倫、戴玉強同魏松，噚晚喺文化中心獻唱，佢哋不時巡迴演出，因乜解究今次喺香港登台？原來又關回歸事。香港北京交流協進會為慶祝特區回歸20周年，同香港歌劇院合辦呢個音樂會，京港協進會主席施榮懷仲同東華三院主席李鋈麟出錢出力，包括贊助逾300個東華三院學生到場聽歌，活動部份收益會撥捐東華三院相關慈善工作。
獻唱者係重量級，到場嘉賓亦份量十足，包括忙住搵人入熱廚房嘅候任特首林鄭月娥、張曉明同董建華。林鄭着到靚靚捧場，入場前企喺莫華倫隔籬喜孜孜，成個小粉絲咁。據知現場演繹歌曲包括《獅子山下》及回歸10周年嘅主題曲《香港始終有你》等。